دليل الإعلام الشعبي للتعامل مع ردود الجمهور  بخصوص شفيق والإخوان المسلمين
 

 

 وجدت على الإنترنت هذا الملف الوافي في الرد على الشبهات التي يثيرها البعض ضد الدكتور مرسي مرشح الثورة  واردت ان يقراها زوار اخوان اون لاين  ولكم جزيل الشكر.

 

مقدمه لسيادتكم
عبدالله صادق

 


أولا: ناس حتصوت لشفيق

 
اللي شايف إن شفيق راجل كويس أو اللي صوّت لصالح عمرو موسى في المرحلة الأولى

1.       شفيق راجل كويس وشريف، فاهم وعنده خبرة ويعرف يدير دولة، وخلفيته عسكرية، وله إنجازات كتير زي المطار؟

الحقيقة إنجازات شفيق كلها أوهام، كان بيرسّي مناقصات المطار بالأمر المباشر على أصحابه زي مجدي راسخ حما علاء مبارك، ومحمود الجمال حما جمال بأرقام فلكية، وكان بيعين معارفه في الأماكن المهمة بمرتبات بالملايين، وكمان تشغيل المطار إداه لمنير ثابت أخو سوزان بالأمر المباشر، وكان بيهتم بالشكل بس في مصر للطيران اللي طياراتها بقت وحشه لدرجة إن مطارات أوروبا كانت حتمنع طيارات مصر للطيران من الهبوط فيها لأنها خطر، وباع الطيارات عشان يغطي على خسائر الشركة، ومشاريعه كلها كانت بتخسر بالملايين. هي دي الإنجازات؟ وتفتكر الراجل اللي باع 400 ألف متر لعلاء وجمال مبارك بـ75 قرش المتر هو اللي حايجيب لنا حقنا م اللي سرقونا؟

 

2.       في ناس كتير بتحب شفيق، والدليل إنه طلع الثاني في الانتخابات، وكان ممكن يطلع الأول؟

في ناس كتير نسيوا إن شفيق هو حبيب مبارك، والمسئول عن موقعة الجمل، وفي ناس أكتر منهم قبضوا رشوة حرام من فلول الحزب الوطني عشان يصوتوا لشفيق. انت عارف إن أعضاء الحزب الوطني اتصلوا ببعض وهم اللي عملوا له الحملة الانتخابية في المحافظات عشان عايزين يرجعوا النظام القديم؟ تفتكر إيه اللي بيخليهم يدفعوا كل الفلوس دي، وهم بتوع مصالح أصلا وفاسدين؟ وبعدين مين الناس اللي بيحبوه إذا كان معرفش يعمل مؤتمر شعبي واحد في أي محافظة، وكان بيعمل مؤتمراته في قاعات مغلقة، وعمره ما عرف يمشي زي بقية المرشحين في الشارع من غير بودي جارد الداخلية أو حراسة الشرطة العسكرية؟

 

3.       هو مين مكانش جزء من النظام القديم؟ ومين كان يقدر يقول لمبارك لأ؟ ومين قال إن شفيق زي مبارك؟

شفيق بالذات كان في قلب النظام، كان رئيس حكومة المخلوع، وصاحبه الروح بالروح، وعاش طول عمره معاه، يعني مكانش مضطر أو خايف أو مجرد جبان، ده بيعتبر مبارك مثله الأعلى لحد النهارده، ومكانش شايف إن 25 يناير ثورة، وكان نفسه إنها تفشل، تفتكر ممكن يكون مختلف عن مبارك؟

 

4.       شفيق مش ضد الثورة، وقال إنه حيحميها ويرجعها للشباب بعد ما الإسلاميين خطفوا الثورة؟

الثورة كان هدفها تغيير النظام الفاسد اللي شفيق كان جزء أساسي منه، ولما كان رئيس الحكومة سمح لأصحابه المجرمين يهربوا م البلد، وياخدوا فلوسنا اللي سرقوها، وماسابش الوزارة إلا بعد ما حرق كل الورق اللي يثبت فساده هو وباقي العصابة، وضيع أدلة اتهام قتلة الثوار، وأفرج عن بلطجية موقعة الجمل، وعمل ترقيات وعلاوات لضباط الداخلية مكافأة على قتل شباب الثورة رغم إنهم كانوا قاعدين في بيوتهم، واحنا اللي بنحرس الشوارع في اللجان الشعبية. ووعد إنه يقضي على أي احتجاج في ساعات زي ما حصل في العباسية!

 

5.       احنا محتاجين راجل عسكري عشان يعرف يتعامل في حالة الحرب، أو يجنبنا الدخول في حرب أساسا؟

دور الجيش وقادته الـ19 إن هم اللى يتعاملوا مع الحرب، وبيتهيألى كفاية ستين سنة بيحكمنا عسكريين من أول عبد الناصر لحد طنطاوي وغرقونا، واللى يجنبنا الدخول فى الحرب واحد سياسى، لإن الحرب بتيجى لما السياسة ما تنفعش.

 

اللي بيدور على الاستقرار والجيل القديم (الآباء والأمهات)

 
6.       مصر مش صغيرة ومحتاجة راجل قوي، وشفيق حيعرف يتعامل مع الفوضى، وحيعرف يتعامل مع العسكري؟

ولما هو قوي ليه مقدرش يتعامل مع الفوضى لما كان رئيس وزراء من سنة؟ وليه حصل الانفلات الأمني؟ ولو هو قادر يتعامل صحيح كان اتعامل معاه من وقتها. الحقيقة إن شفيق حيكون مجرد شخشيخة في إيد العسكري.

 

7.       إحنا خايفين على بيوتنا وأولادنا، وشفيق قال إنه حيرجع الأمن في 24 ساعة؟

هو قال كمان إن الجيش عمل بروفة في العباسية، ولو حد نزل يتظاهر حيخلي الجيش ينزل يلمهم كلهم في ساعات، يعني حيعمل زي مبارك، ويركز على ضرب المتظاهرين السلميين، ويخلي الداخلية والجيش لحمايته وحماية نظامه، ويسيب لنا البلطجية وقطاع الطرق ياكلونا، زي ما سابهم يقتلوا المتظاهرين يوم موقعة الجمل.

 

8.       خلاص بقى عملتوا الثورة وكفاية لحد كده، إحنا حققنا حاجات كتير جدا، ومحتاجين البلد تتلم، وممكن تحصل حرب أهلية، ونخسر كل حاجة؟

الرجوع للنظام القديم معناه إننا حنخسر كل اللي حققناه بدمنا زي ما حصل في ثورة رومانيا، وبعدين مين قال إننا عايزين مظاهرات تاني؟ العيال بتوع التحرير مش حيرجعوا الميدان إلا لو شفيق كسب، وساعتها البلد كلها حاتولع، كل الثوار والشباب حيرفضوه، ومش بعيد يحاول يورط الجيش ويضربهم بأوامر من شفيق، وحتبدأ ثورة جديدة. لكن تسليم النظام لناس جديدة حيخلي الكل يهدأ ويركز على البناء وعجلة الإنتاج. 

 

اللي حالته الاقتصادية صعبة وبقت أصعب في الثورة، أو خسر فلوس بسببها

 9.       احنا تعبنا خلاص وعايزين نخلص، ونفسنا كل حاجة حترجع زي ما كانت؟

وهو احنا وضعنا كان حلو قوي قبل الثورة؟ إحنا نفسنا نعيش عيشة نضيفة، ويكون لنا كرامة إحنا وولادنا، والوضع اللي احنا فيه ده بسبب النظام القديم اللي لسه بيحكمنا لحد النهارده، وعشان كده لازم نغيره، ولو انتخبنا شفيق يبقى كأنك يا ابو زيد ما غزيت. دول كانوا سارقين قوتنا و قوت عيالنا، ده حتى قصر الرئاسة كتبه المخلوع باسم المدام، ومش عايزين نعيده.

 

10.   الثورة معملتش حاجة غير إن السياحة اتضربت، والبورصة وقعت، والاحتياطي خلص؟

ده لأن الثورة لسه ماستلمتش الحكم لحد النهارده، والفلول هم اللي ماسكين كل حاجة في البلد. لو جه رئيس جديد وحكومة جديدة حنشوف تغيير في كل حاجة، والثوار حيهدوا، والسياح والمستثمرين حيرجعوا تاني لما يلاقوا الثورة نجحت، والبلد استقرت.

  

اللي خايف م الإخوان (أو الإسلاميين)


11.   فوز مرسي حيرجع النظام القديم، لأن كل السلطات حتتركز في إيد الإخوان، وحيبقى حزب وطني جديد؟

في كل البلاد الناجحة والمتقدمة بيبقى رئيس السلطة التنفيذية والسلطة التشريعية من حزب واحد، زي أمريكا وانجلترا وفرنسا، وحتى تركيا وماليزيا، وغيرهم كتير. مشكلتنا في مصر كانت إن الحزب الوطني مزور وفاسد، يعني بيحكم غصب عن الناس وبيسرقهم، لكن أي حزب محترم وأعضاؤه شرفاء، وجايين بالانتخابات النزيهة مش ممكن يبقوا حزب وطني جديد، وبعدين هو احنا خايفين الإخوان يبقوا حزب وطني جديد، نقوم ننتخب مرشح الحزب الوطني القديم أضمن!؟

 

12.   لكن كونهم مش حرامية وغشاشين مايمنعش إنهم حيسيطروا على كل حاجة، ومحدش حيقدر يقف قدامهم؟

الإخوان مش حيقدروا يحكموا ولا يشكلوا وزارة لوحدهم، وباقي الأحزاب حيعرفوا يتفاهموا معاهم، ويضغطوا عليهم لو لزم الأمر، والقوى الثورية كمان واقفة لهم ع الواحدة، ومش حاتسكت لهم، وتجربة لجنة الدستور شاهدة، ده غير إن لا الجيش ولا الشرطة ولا الإعلام ولا القضاء تبعهم. أما مع شفيق، فمفيش حاجة حتتغير، فلول الحزب الوطني حيفضلوا يمصوا في دمنا، والثوار حيدخلوا السجن، ومش بعيد البرلمان اللي حيلتنا يتحل، والبرلمان الجديد يبقى كله من رجالة شفيق، والدستور الجديد يتفصّل له!

 

13.   الإخوان والسلفيين عايزين يطبقوا الشريعة، والدولة حتبقى دينية، مش مدنية، ومصر حتبقى زي إيران أو أفغانستان؟

إنت أصلا عارف يعني إيه شريعة؟ تطبيق الشريعة يعني ضمان حفظ النفس والدين والمال والعرض والعقل لكل الناس، يعني إقامة العدل والمساواة والأمن، والقضاء على السرقة والرشوة والمخدرات. وبعدين مصر من يوم ما دخل الإسلام فيها والشريعة مطبقة، والكلام ده فضل أكتر من 1300 سنة من غير أى مشاكل، وهما أخر 100 سنة من ساعة ما بطلنا نطبق الشريعة مع الاحتلال والمشاكل بدأت، والأيام بتثبت إن أمن الدولة هو اللى كان ورا المشاكل دى علشان يخوف الناس.

 

إيران دولة شيعية، ونظامهم مختلف تماما عننا، ومع ذلك تصدق بقى إن حتى إيران بقوا متقدمين عننا؟ وعلى الأقل عندهم أكلهم، وسلاحهم. أما أفغانستان فبقت كده بسبب الإحتلال السوفيتي ومن بعده الأمريكي. والإسلام مفهوش حاجة إسمها دولة دينية من الأساس، ده إختراع الكنيسة الغربية. والدولة اللي الإخوان بيتكلموا عليها مدنية بمرجعية إسلامية، مش دولة دينية الحاكم فيها بيحكم باسم ربنا. وبعدين هم حيحطوا دستور مع نفسهم؟

 

14.   الإخوان والسلفيين حينقلبوا على الديمقراطية اللي جابتهم، ومش حيسمحوا لحد غيرهم يحكم؟

مين دول اللي ينقلبوا؟ ده احنا نقلبها على دماغهم! الإخوان ماهماش أغلبية في البلد، ولا معاهم إعلام، ولا الجيش حيحميهم مننا، وكلهم 42% في مجلس الشعب، ومش في إيدهم يلغوا الانتخابات، وأديك شفت اللي حصل لهم في تشكيل لجنة الدستور، الدنيا اتقلبت لما التشكيل ماعجبش الناس، وبعدين احنا عملنا ثورة على مبارك أبو ثلاثين سنة، مش حانعرف نغير مرسي بعد أربع سنين؟ اللي يسمع كده يفتكر إننا كنا بنغير رئيس كل أربع سنين! متنساش إن شفيق هو مبارك، هو ده اللي مش حانعرف نشيله غير بالدم!

 

15.   انت عارف إن مرسي في رقبته بيعة للمرشد؟ يعني م الآخر المرشد هو اللي حيمشيه ويمشينا على مزاجه، ونبقى زي إيران؟

إيران تاني؟ أولا المرشد ده مش حاكم بأمر الله في الإخوان، يعني هم عندهم بياخدوا القرارات يا إما في مكتب الإرشاد أو في مجلس الشورى، وفي الحالتين المرشد بيبقى صوته زي أي عضو تاني في التصويت، وبينفذوا رأي الأغلبية، ثانيا المرشد قال إنه أحل مرسي من بيعته، ومرسي قال إنه لما يحلف على الولاء للدولة والدستور كرئيس جمهورية حيتعامل مع المرشد زيه زي أي حد تاني، أما قصة إيران دي فملهاش علاقة إطلاقا لأن الشيعة عندهم نظام للحكم بيعتمد على ولاية الفقيه، ومفيش حاجة زيه عند أي مذهب في السنة.
 
   

المسيحي

 16.   مع شفيق حنضمن حقوقنا وبناء الكنائس؟

هو مين اللي بدأ يضايق المسيحيين في بناء الكنائس، وخلاها في إيده وحده؟ المسيحيين من 1400 سنة بيبنوا الكنائس وحقوقهم كانت محفوظة، وده بالدين والقانون، الإسلام بيحاسبنى لو أخدت مال المسيحى زى المسلم، وكمان القانون زمان وفى المستقبل هو اللى هيحافظ على حق كل واحد، ومفيش حادثة واحدة أيام أما كنا بنطبق الشريعة والقانون كانت بتحصل.

 

17.   شفيق أقرب للأقباط لأنه مش بيفرق على أساس الدين؟

شفيق أقرب لمصلحته وبس، وهو فعلا مبيفرقش على أساس الدين، علشان كدة حيسرق ويقتل الكل! والحاكم المسلم اللي يعرف ربنا بيدى كل إنسان حقه أيا كان دينه. وفى حكايتين عن أصحاب الرسول يبينوا الحاكم المسلم بيتعامل إزاى مع غير المسلمين: سيدنا عمر شاف واحد كبير بيشحت فسأله: انت بتشحت ليه؟ رد عليه الراجل وقاله أنا يهودى كبير فى السن، و معنديش دخل. مباشرة أمر إن المحتاجين من غير المسلمين ياخدوا من بيت المال اللى يكفى حاجتهم زى المسلميين. وسيدنا علي اختصم يهودي عند القاضي إنه مش راضي يرجع له درعه، القاضي طلب من سيدنا علي يثبت ده، معرفش، فحكم لصالح اليهودى، وده بالشريعة والقانون، مش عشان واحد يمن على المسيحيين إنه بيجيب لهم حقهم، ويلوي دراعهم به.

 

18.   بس الإخوان (أو الإسلاميين) بيضطهدوا غير المسلمين؟

الإسلام أساسا بيدعو المسلم للمودة والرحمة مع الجميع، والقراّن بيقول لنا ده بشكل واضح: "ولتجدن أقربهم مودة للذين آمنوا الذين قالوا إنا نصارى، ذلك بأن منهم قسيسين ورهبانا وأنهم لا يستكبرون"، وكمان: "لا ينهاكم الله عن الذين لم يقاتلوكم فى الدين ولم يخرجوكم من دياركم أن تبروهم و تقسطوا إليهم"، البر ده زي بر الوالدين، والقسط اللي هو العدل، وغيرها آيات تانية كتير. أكيد المسلم الملتزم هو اللي حيطبق أوامر دينه، وفي كل الأحوال إحنا حنطبق القانون، و كل الناس متساويين قدام القانون. وفي الحديث: "استوصوا بأهل مصر خيرا، فإن لكم فيهم نسبا ورحما"، الرسول تزوج مصرية قبطية زى ما سيدنا إبراهيم تزوج مصرية برضه.

 
اللي بيكره الإخوان (أو الإسلاميين)

 
19.   الإخوان انتهازيين وطماعين، كدبوا وغيروا كلامهم؟

لو هما طماعين كانوا ما صدقوا لما الناس قالت الكتاتنى يمسك الرئاسة وهما يشكلوا حكومة، زائد هو إيه المطمع فى الرئاسة اليومين دول؟! ده مغرز! وكدبوا فى إيه، و غيروا كلامهم فى إيه؟ مجلس الشعب قالوا 35-40% وصلت لـ 42% بظروفها، وميقدروش يمرروا قرار واحد لوحدهم! اللجنة الدستورية عدد الإخوان فيها 37%، ومع ذلك حيقللوا العدد كمان في التشكيل الجديد، أما الرئاسة هو ليه الليبراليين وغيرهم (كل الأحزاب) مقدموش مرشحين؟! هما عايزين البلد ترجع لمبارك وشركاه ولا إيه؟ ما الإخوان لما قالوا نتفق كلنا على مرشح توافقي من بره الجماعة اتقال يبقى ده مرشح الجيش، والكل رفض، وفي الأخر قبل شهر واحد نزلوا مرشح والتانى وأثبتت الأيام إنهم صح، وكان مستحيل يأيدوا أبو الفتوح لإن برضه أول حاجة حتتقال ده فيلم، والإخوان عاملينه مع أبو الفتوح، وكدابين وانتهازيين، الخ.

 

20.   الإخوان أنانيين، ولا بيهمهم إلا مصلحتهم الشخصية؟

لو كانوا كده، كان سهل جدا يشوفوا مصلحتهم مع مبارك، وبلاها سجون ووجع قلب ثلاثين سنة، أو كان ممكن من أول الثورة يحطوا للعسكري اللي هو عايزه في الدستور زي ما غيرهم عمل، أو يأيدوا الرئيس اللي هو عايزه، ويخلوه يخلص الانتخابات في ست شهور بعد الاستفتاء، ويشوفوا مصلحتهم.

 

21.   طيب افرض انتخبناهم ورجعوا يتحالفوا مع العسكري زي الأول؟

وفين أمارة تحالفهم؟ بأمارة مليونيات خلع شفيق، ولا مليونيات محاكمة مبارك، ولا مليونيات الانتخابات، ولا مليونيات وثيقة السلمي، ولا مليونيات الانتخابات الرئاسية؟! هو لازم ينزل كل يوم مليونية عشان يبقى مش متحالف؟ ولا لازم يجامل في أي مليونية حد عملها حتى لو كان شايف إنها غلط؟ أمال يشتغل امتى عشان يستعد للمواجهات مع الفلول واللى تبعهم؟

 

22.   الإخوان أداؤهم زي الزفت، ولو انتخبتهم حيخربوا الدنيا؟

انت بتتكلم على افتراض محصلش إنهم مسكوا الحكومة لسه، لكن إحنا جربنا نظام مبارك ثلاثين سنة فعلا، وخربوا الدنيا خلاص! ولو قصدك على مجلس الشعب، فده مش بتاعهم لوحدهم، ومع ذلك عندك فكرة مجلس الشعب ده عمل إيه لحد دلوقت؟ تعديل قانون انتخابات الرئاسة اللي منع التزوير، وقانون عزل الفلول 10 سنين، وقانون تعويضات أسر الشهداء والمصابين، وقانون تثبيت العمالة المؤقتة، وقانون الثانوية العامة سنة واحدة، ومشروع قانون إلغاء محاكمة المدنيين أمام القضاء العسكري، ومشروع الجسر البري مع السعودية، والحد الأدنى والأقصى للأجور، وغيرها كتير، فاضي ولا أكمل؟ (الحوالات الصفرا، وتعويضات الحمى القلاعية، وضبط توزيع أراضي القرعة)

 

23.   الإخوان بينجحوا في الانتخابات بالسكر والزيت والضحك ع الغلابة؟

الصراحة الإخوان بيوزعوا زيت وسكر من أكتر من خمسين سنة، ومش بس زيت وسكر، لا دي لحمة وهدوم وجزم وأدوات مدرسية، وتجهيز عرايس، وبيسددوا ديون عن الناس اللي في السجن، وده كل شهر مش فى موسم الانتخابات بس. أمال فلوس الزكاة بتاعتهم ومساعدة الناس الغلابة دي ينسوها، ويرموا الفلوس لحرامية الدولة اللي سرقوا الزكاة؟ ده حتى فلوس المعاشات سرقوها، كنتم عايزنهم يدوا عصابة مبارك فلوس زكاتهم عشان يسرقوها هي كمان والغلابة ميوصلهمش حاجة خالص؟

 

زائد هو في حاجة تانية، هي نقابة المهندسين ولا الأطباء ولا اتحاد الطلاب بينجحوا فيها بالزيت والسكر؟ طيب وإيه نظام انتخابات تونس وتركيا والمغرب وفلسطين؟

 

24.   الإخوان بيتكلموا باسم الدين، بيستغلوه عشان محدش يعارضهم؟

الإسلام دين ودنيا، وأي مسلم بيعمل لدنياه وأخرته، واللي بيننا وبين بعض الدستور والقانون. وسياسة الإخوان مبنية على فهمهم للإسلام، وبتعبر عن رؤيتهم في تطبيقه، مش شرط تعبر عن الإسلام نفسه، وشيء طبيعي إن أي حد يعارضهم، ويغلطهم في أي قرار أو فعل، وميقدروش يقولوا إن قراراتهم دي مقدسة أو إلهية.

 

25.   يا عم دول بيكفروا الناس التانية؟

على حد علمي دي محصلتش خالص، امتى كفروا أي حد؟ وافرض واحد منهم حاول يكفر حد مع إنها محصلتش، تفتكر السلفيين حيبقى موقفهم إيه؟ والأزهر حيبقى موقفه إيه؟ طيب وكل العلماء؟ ولو فرضنا جدلا إن في حد كافر، والأزهر والكل قالوا عليه كافر فعلا بسبب حاجة هو قالها أو عملها على الملأ، تفتكر ساعتها المشكلة تبقى عند مين؟ وعد كده في كام واحد اتقال عليه كافر في مصر في خلال الـ100 سنة اللي فاتوا عشان نعرف هي المشكلة موجودة ولا لأ.

 

 
صاحب مصالح مع الفلول أو النظام القديم أو اللي متعاطف مع النظام القديم أو اللي كان ضد الثورة م الأول ماتضيعش وقتك معاه، وكفاية تقول له دم الشهداء في رقبتك 

 
ثانيا: ناس حتقاطع أو حتبطل صوتها أو محتارين ومش عارفين ياخدوا قرار

 
اللي مش عارف الإخوان أو مرسي أو مشروع النهضة

26.   يا عم اللي تعرفه أحسن م اللي ماتعرفوش، احنا ايش عرفنا الإخوان دول يطلعوا إيه؟

عندك كتاب فقه السنة للشيخ سيد سابق؟ بلاش، تسمع عن الشيخ محمد الغزالي ولا يوسف القرضاوي؟ سمعت دروس عمرو خالد أو طارق السويدان أو راغب السرجاني؟ أهو كل دول تربية الإخوان. أقول لك حاجة تانية، عندك حد بيحفظ ولادك قرآن؟ طيب عارف الناس اللي بينظموا ساحة صلاة العيد ويدوا العيال هدايا وبلالين؟ يا عم مرحتش تتعالج في مستوصف تبع جامع، ولا اشتريت حاجات سعرها رخيص من المعارض الشعبية؟ ما معظم دول إخوان!

 

27.   ليه عاملين جماعة يعني؟

الجماعة هدفها أصلا الحفاظ على الدين، وتكوين إنسان مسلم، وبيت مسلم، ومجتمع مسلم، وبيعملوا أعمال خيرية ودعوية، وموجودين في 130 بلد في العالم، وبيخلوا أعضاءهم يشتغلوا في خدمة المجتمع في النقابات والاتحادات والبرلمان، ولما قامت الثورة عملوا حزب زي بقية الناس.

 

28.   يعني هم الإخوان ملائكة؟ هم مسلمين، واحنا مش مسلمين؟

لأ خالص بالعكس، الإخوان ناس زيهم زي أي ناس، ليهم أخطاءهم ومشاكلهم، وفيهم الكويس والوحش، وسياستهم مبنية على فهمهم للإسلام، وبتعبر عن رؤيتهم في تطبيقه، مش شرط تعبر عن الإسلام نفسه، وهم معترفين إنهم لما بيغلطوا ده مش معناه إن الغلط في الإسلام، بيبقى الغلط في رؤيتهم، أو في أسلوب تطبيق الرؤية دي، عشان كده طبيعي إنهم يراجعوا مواقفهم، ويعتذروا عن أخطاءهم، وميقدروش يقولوا إن قراراتهم دي مقدسة أو إلهية.

 

29.   هو مين محمد مرسي ده أصلا؟

أستاذ ورئيس قسم في كلية الهندسة، وعنده ستين سنة، أخد الدكتوراه من أمريكا، واشتغل شوية في ناسا، ودرّس في كذا جامعة هناك زمان، ولما كان نائب في مجلس الشعب من سنة 2000 لحد 2005 كان رئيس كتلة نواب الإخوان، وعمل حاجات كتير خلته ياخد جائزة أحسن برلماني في العالم، ولما تظاهر لرفض تعديلات مادة 76 بتاعة التوريث في الدستور اتقبض عليه، وكان مؤسس في الجبهة الوطنية للتغيير مع عزيز صدقي سنة 2004، ومؤسس في الجمعية الوطنية للتغيير مع البرادعي سنة 2010، واتقبض عليه أول ما قامت الثورة يوم 27 يناير، ولما الإخوان عملوا حزب الحرية والعدالة بقى هو أول رئيس له، ومن مؤسسين التحالف الديمقراطي، وقدر يكسب الأغلبية في انتخابات البرلمان.

 

30.   بيقولوا ولاده أمريكان، يعني كان نفسه يعيشوا هناك، ولو قامت حرب بينا وبين أمريكا حيحاربوا مع مين؟ ولما مصر مش عاجباه ليه عايز يبقى رئيسها؟

 

الراجل كان بيعمل دكتوراه في أمريكا لما مراته ولدت ولاده الكبار، وأخدوا الجنسية بشكل تلقائي، يعني كنت عايزه ينزّل المدام مصر مخصوص عشان العيال مايخدوش الجنسية؟ وانت لو كنت مكانه كنت حاتعمل ايه؟ وبعدين هم من ساعة ما رجعوا من 27 سنة ماراحوش هناك تاني، ولو كانوا بيستفيدوا من جنسيتهم دي كانوا خلوا سفارة أمريكا تمنع اعتقال ابنه الأمريكاني اللي كانت الحكومة بتحبسه كل شوية عشان أبوه يبطل استجوابات في مجلس الشعب ضدها! وكانت أمريكا حمتهم لما كانوا حيموتوا في الثورة على إيد البلطجية!

 

31.   يا عم ده رئيس استبن مش مترشح بإرادته؟

ولا الشاطر كان مترشح بإرادته! الفكرة إن الإخوان اتفقوا على إن أي قرار ياخدوه سوا على رأي الأغلبية عن طريق مجلس الشورى، وأي قرار يطلع بالشورى يبقى الكل ملتزمين به، واتفقوا كمان إنهم ميرشحوش حد للرئاسة يكون طلب يبقى رئيس، يعني المرشح للرئاسة يبقى مُكلف من الجماعة، مش هو اللي عايز يمسك الحكم، وبعد ما اختاروا الشاطر عرفوا إن العسكري ناوي يطيره، عشان كده دخلوا مرسي كمان، ولو كان مرسي نفسه في الرئاسة من الأول كان يبقى أولى لأنه رئيس الحزب أصلا. واللي بيطلب الرئاسة ربنا بيوكله لنفسه، لكن اللي بيتكلف بالرئاسة ربنا بيعينه عليها. وع العموم أهو الاستبن ده هو اللي طلع الأول في الانتخابات، ومش في مصر بس، ده هولاند رئيس فرنسا الجديد كان برضه استبن :)

 

32.   بس أنا مش مقتنع بإنه يصلح كرئيس؟

الرئيس مهم فيه ثلاث حاجات: البرنامج بتاعه، وقدرته على تنفيذ البرنامج ده، ونزاهته، يعني الخطة ومعاها القوة والأمانة، ومشروع النهضة بشهادة الجميع كان من أحسن البرامج الانتخابية، والراجل دكتور مهندس، ووراه أكبر حزب في مصر حيساعده ينفذه بسرعة، ومن ناحية الأمانة الراجل حافظ القرآن، وطول عمره في خدمة الناس. وفي الأول والآخر إنسان واقعي، مش بتاع وعود رومانسية، وكل حاجة بالمنطق والورقة والقلم. ولو حبيت قارن بقى، وشوف حتلاقي الناحية التانية إيه أحسن؟ البرنامج، ولا الكفاءة، ولا النزاهة!

 

33.   هو إيه مشروع النهضة؟

هو مجموعة مشروعات كتير عشان مصر تتقدم في كل المجالات، وتبقى أهم بلد في المنطقة تاني، ويبقى المصري محترم في كل مكان، والشغل على محاور كتير ما بين الاقتصاد، والأمن، والنظام السياسي، والتعليم، وتطوير كل أجهزة الدولة (حكومة، قضاء، إعلام)، وحل المشاكل الطائفية (الأقباط، أهل سيناء، الواحات، النوبة)، والتعامل مع الدول اللي حوالينا بشكل أحسن. وعلى فكرة المشروع مش سر، ده منشور ومكتوب بالتفصيل، حتلاقيه ع النت.

 

34.   وهو مرسي حيعمل كل ده؟

مرسي الأول حيركز على القضايا المستعجلة في أول 100 يوم، يعني أهم مشاكل الأمن، والعيش، والبنزين، والزبالة، وقوافل طبية في المحافظات، واتصالات بالبلاد التانية عشان الفلوس المتهربة، والتحقيق في حوادث الثورة م الأول عشان حق الشهداء والمصابين.
مشروع النهضة متقسم على ثلاث مراحل: واحدة تاخد سنتين عشان تتعامل مع المشاكل اللي مش مخليانا نعمل حاجة، زي المشاكل الطائفية، والعشوائيات، والفقر الشديد، والأمن، والمرحلة التانية خمس سنين عشان نبني البلد صح، والمرحلة الثالثة خمس سنين كمان عشان نوصل للمستوى المتقدم اللي احنا عايزينه، وده معناه إن برنامج مرسي للأربع سنين الجاية حينفذ المرحلة الأولى وبداية المرحلة التانية بس.

 

35.   بس الإخوان معندهمش خبرة سياسية كفاية عشان ينقذوا البلد في المرحلة الصعبة دي؟

ده صحيح، وعشان كده لازم يعملوا وزارة يبقى فيها ناس خبرة، ومن كل التيارات، وعشان كده كمان اتفقوا مع خبراء مصريين، ومن بلاد تانية يساعدونا، وأكيد كل الناس المحترمة لما يلاقوا ناس عايزين يشتغلوا لوجه الله، مش بيسرقوا ولا ينهبوا حيساعدوهم، واحنا كلنا لازم نساعد، وشوية شوية الدنيا حتمشي، وأحسن م الأول 100 مرة إن شاء الله.
 

اللي صوّت لأي مرشح غير شفيق أو موسى في المرحلة الأولى

36.   إيه الضمانات اللي حيدوها لنا لو انتخبنا مرسي؟

مرسي قال إنه عايز المرشحين التانيين يبقى منهم نواب للرئيس بمهام محددة، ويعلن عنها قبل الإعادة، وقال إنه مستعد يبقى رئيس الحكومة مش م الحرية والعدالة، وتبقى حكومة ائتلافية تشارك فيها أحزاب كتير، وقال إن اللجنة التأسيسية حيقلل فيها نسبة الإخوان، وحيلتزموا في الدستور بوثيقة الأزهر، يعني مش حيخترعوا حاجة جديدة، وحيبقى في أقباط في مؤسسة الرئاسة، وممكن نائب حتى، ومش حيبقى في طوارئ أو اجراءات تتاخد ضد الصحافة، ومستعد ينفذ مشاريع من برامج المرشحين التانيين لو عايزين يتبنوها. عايزين ضمانات تاني؟ طيب ما يقعدوا معاه المرشحين التانيين ويقولوا عايزين إيه تاني؟

 

37.   لو الاخوان خايفين على مصر يبقى مرسي يتنازل لصباحي؟

قانونا مينفعش، ولو مرسي إتنازل يبقى شفيق حيكسب بالتزكية. ولنفترض إنه ينفع، طب وليه ما يتنازلش الإثنين لأبو الفتوح؟ حسب كلام صباحي إن أبو الفتوح من الثوار، و حسب كلامك صباحى وطني أكتر من الإخوان، شوف كده يرضى يتنازل هو كمان عشان مصر وبلاش للإخوان، يتنازل لمرشح ثورى زيه. وبعدين هو مرسي حيطنش كل اللي انتخبوه وبقى الأول، ويقول لهم معلش أنا حاسيبها لواحد تاني؟ طب كان بيترشح ليه م الأول، عشان يتنازل؟

 

الثوري اللي زعلان من الإخوان

38.   الإخوان باعوا الثورة؟

باعوها بكام؟ يعني أخدوا إيه تمن الثورة؟ كام وزير، وكام محافظ، وكام شركة بترول، وكام شركة نقل، وكام ميناء، وكام جرنال، وكام رئيس مدينة أو مركز أو حي؟ ولا واحد! كلهم لواءات جيش اللي ماسكين كل الحاجات دي.

 

طيب باعوا الثورة في إيه؟ يعني ماماتش منهم حد أو اتسجن أو معملوش مليونيات؟ طب ما هم نزلوا في مليونيات خلع شفيق، ومحاكمة مبارك، والانتخابات، ووثيقة السلمي، والانتخابات الرئاسية؟ هم لازم ينزلوا كل يوم مليونية، أو يجاملوا في أي مليونية حد عملها حتى لو كانوا شايفين إنها غلط؟ يعني أي حد يقول للإخوان إنزلوا، ينزل الإخوان، يقول لهم إرجعوا، يرجع الإخوان؟ ممكن جدا يكون في مليونيات تانية كان المفروض ينزلوا فيها ومانزلوش، لكن كده مايبقوش باعوا الثورة، كده يبقوا أخدوا قرار غلط، مش أكتر.

 

39.   دول باعونا في محمد محمود، وقالو علينا فوضويين، وبانديتا؟

زي ما اتفقنا الإخوان بيغلطوا، ده طبيعي، وفي حاجات هم اعترفوا بإنهم غلطوا فيها، وفي حاجات هم اختلفوا بينهم وبين بعض فيها، وفي حاجات اتعلموا فيها من غلطهم، على سبيل المثال قرارهم بعدم النزول في محمد محمود مكانش عشان هم مع الداخلية، لكن عشان يتجنبوا قتل أكتر، ده كان اجتهادهم ساعتها. ومقالة بانديتا دي في الجرنال بتاعهم كانت غبية فعلا، واعتذروا عنها بعدين، وبعدين ما هم كمان بيتشتموا كل يوم في كل الجرايد!40.   دول عملوا صفقة مع الجيش، وهتفوا للمشير في جمعة قندهار، واحتفلوا بالثورة، وعملوا ميليشيات قدام مجلس الشعب؟

 

بنفس المنطق تاني: الصفقة كانت ايه مقابل ايه؟ يعني مثلا حطوا للعسكري اللي هو عايزه في الدستور زي ما غيرهم عمل، أو أيدوا الرئيس اللي هو عايزه؟ مفيش حاجة من دي، طيب وكان إيه المقابل؟ محدش يعرف! وفي جمعة قندهار اللي هتفوا للمشير قالوا يا مشير قول الحق إسلامية ولا لأ، ويا مشير جيش محمد في التحرير، ومكانوش إخوان أصلا!

 

أما احتفال الثورة فمكانش له لازمة، بس برضه مش قضية، وبعدين ما هو كان في احتفال بالثورة في التحرير قبلها ليلة رأس السنة، ومحدش قال عليها حاجة! وأخيرا كلمة ميليشيات معناه تنظيم عسكري مسلح، هم كانوا مسلحين؟ لأ طيب يبقى مسمهاش ميليشيات، وبرضه مكانش لها لازمة خالص، ومش قضية، وكانت مرة وعرفوا غلطهم من بعدها.

 

41.   الإخوان هم السبب في الوضع اللي احنا فيه بمخالفتهم للإجماع الوطني؟

لو الإخوان هم السبب في كل حاجة يبقى خلاص نعترف إنهم الكل في الكل، يشيلوا المسئولية كلها، ونسيبهم يتصرفوا، لكن الوضع مش كده، دخول مرشحين رئاسة كتير كان عند بين كل المرشحين، مش بس الإخوان، ولو افترضنا الإخوان وحشين، ليه حمدين وأبو الفتوح ماتفقوش مع بعض وكسبوا الانتخابات من أول مرة؟ عشان كل واحد شايف إنه أنسب من التانيين.

 

اللي كان مقاطع في المرحلة الأولى

42.   كان معايا حق، محدش م المرشحين أصلا يستاهل؟

ممكن يكون في ناس أحسن منهم، بس هم أكيد أحسن من جمال مبارك اللي كان زمانه الريس دلوقت لولا فضل الله ثم الثورة، خليك واقعي وخد خطوة عشان ربنا يكرمنا بنظام جديد يبقى فيه فرصة لأحسن ناس تظهر وتحكم إن شاء الله.

 

43.   الشعب ده جاهل ويستاهل اللي يجرى له؟

الشعب ده هو اللي نجح الثورة وخلع مبارك، والشعب ده هو اللي مش عايز الثورة تبقى فوضى، وخايف على البلد ومستعد يموت عشانها، والشعب ده اللي سقط الفلول في انتخابات مجلس الشعب، وهو اللي صوت بنسبة 75% ضد الفلول في انتخابات الرئاسة، وهو اللي حيسقط شفيق في الإعادة، بس محتاج مجهود من الناس المتنورين زيك.

 

44.   معانا 9 مليون صوت هننزل الميدان تاني والثورة مستمرة، ومفيش فايدة م الانتخابات، خلي شفيق يكسب عشان تقوم ثورة جديدة ؟

ومين قال لك إن لو شفيق كسب إنك حتقدر ترجع الميدان أصلا! ومين قال لك إن الملايين دي حاتنزل تاني بعد ما شفيق هدد بتكرار العباسية؟ اللي حيحصل إننا ممكن ننزل فعلا، لكن الملايين مش حتتحرك غير لما ناس كتير تموت وتتسجن، واحنا لسه قدامنا النهارده فرصة نستبعد الاختيار ده، لكن لو اضطرينا له يبقى آدي الله وآدي حكمته.

 

45.   إحنا معملناش الثورة عشان ننتخب في الآخر إخوان أو فلول، أنا مش فارق معايا والاثنين وحشين؟

صعب تعتبر اللي قتل وسرق وخرب البلد زيه زي اللي بيفكر بطريقة انت مش مقتنع بها، وانت عارف إنه لا حيسرق ولا حيفتري، وبعدين مقاطعتك للانتخابات حيبقى معناها إنك تلبس الأوحش، وتخسر فرصة إن يمكن الإخوان يعملوا حاجة كويسة لو قدروا، ولو الناس ساعدتهم.

 

46.   الاختيار صعب بين فاشية عسكرية أو فاشية دينية؟

إيه يا عم فاشية والكلام الكبير ده؟ يعني إيه فاشية أصلا؟ أنا معاك إن سيطرة الجيش على كل حاجة بقت صعبة، ولازم يبقى لها آخر، أما موضوع الدينية ده فالإسلام مفهوش حاجة إسمها دولة دينية من الأساس، ده إختراع الكنيسة الغربية. والدولة اللي الإخوان بيتكلموا عليها مدنية بمرجعية إسلامية، مش دولة دينية الحاكم فيها بيحكم باسم ربنا. وبعدين هم أصلا ولا حيحكموا لوحدهم، ولا حيحطوا دستور مع نفسهم، ولا يقدروا يتحكموا وهم ولا الجيش بيحميهم، ولا الإعلام حيسكت لهم على غلطة.