"إيه رأيك نعمل مشروع للمكسب غير المشروع؟"
كان صاحب المذكور أدناه من أهل الصوت المسموع
رد المذكور قال: "ليه لأه سيبني أفكر في الموضوع"
المذكور مسئول متسيط والشعب بيشكي من الجوع
كل اللي يهمه أن المنصب يسمح له يسير في الممنوع
وطريق الهبش مسار واحد للمكسب ومافيهشي رجوع
استولى المذكور مع صاحبه عالأرض، صحاري ومزروع
فدادين ملايين ريها ممكن بالراحة، لا جهد ولا دموع
وأراضي مشاريع زراعية قلبوها مباني في أسبوع
آلاف الفدادين بقى تقسيمها بالمتر في فترة تسقيع
بعدها تتباع بالقطاعي ويا ما أحلى نظام التقطيع
والمذكورين خدوا بنفوذهم من بنك رئيسي له فروع
خدوا كم مليار، قرض ميسر والتيسير له عب وسيع
والمليارات هربت بره وهيبتنا ضيعها وضيع
وضيع المذكور ووضيع صاحبه بقوا عشرات، والكسب سريع
وجزيرة كبريت أهداها "فريق" الغبرا وفعله مريععلشان يرضي الست الهانم والمثل الأعلى اللميع
خصصها ببلاش تقريبًا لأولادهم، لا إيجار ولا ريع
سي جمال وعلاء بقو ملاكها من غير معروض ولا توقيع
والأغرب من دا بيان صادر تصدره عموميه بتبيع
أملاك جمعية سي شفيق ببلاش لاولاد المخلوع
وبيانهم واضح وصريح إن التخصيص مش ممنوع
لمواطنين، وجمال وعلاء مصريين من نفس النوع!!
أثبت أعضاء جمعيتهم أن فِ مصر فريق مسروع
بيسابق بعضه لتحقيق المكسب غير المشروع
ثوره مضادة في كل مكان وأداءها ممقوت وشنيع
والمذكور أعلاه أفَّاق ننصفه لو قلنا إنه وضيع
---------
