مسرحية العيد.. الحاج سعيد

يعلن موقع (إخوان أون لاين) عن مسابقة فنية لتمثيل "مسرحية العيد.. الحاج سعيد"، وذلك بهدف تشجيع الفن الراقي والهادف واكتشاف المواهب الشابة وإدخال البسمة على جموع المصريين.

 

شروط عامة:

تُمثَّل المسرحية خلال حفلات فنية جماهيرية عامة تنظم في أيام عيد الأضحى 1433ه.

 

تُصور المسرحية فيديو وتُرفع على موقع يوتيوب.

 

يُرسل رابط المسرحية على يوتيوب ومعلومات الاتصال إلى موقع (إخوان أون لاين) على البريد إلكتروني [email protected] في موعد أقصاه 20 نوفمبر 2012م.

 

يقوم الموقع بوضع جميع الروابط التي تصله في صفحة خاصة ويعلن عن استطلاع رأي للجمهور لاختيار المسرحية الفائزة (للجمهور 50% من الدرجة + 50% للجنة التحكيم).

 

البنود الآتية ترفع من تقييم المسرحية: أداء الممثلين – الإضافة والابتكار – الفكاهة – عدد الجمهور وتفاعله -  الملابس والديكورات.
تحصل المسرحية الفائزة على شهادات تقدير لجميع أفراد فريق العمل وجائزة قدرها 2000 جنيه.

 

نص المسرحية (يمكن للمخرج الإضافة أو الحذف أو التعديل) :

مسرحية العيد .. الحاج سعيد

تأليف: خالد إبراهيم [email protected]

الشخصيات: 1ـ حسن      2ـ سعيد     3ـ زبون1       4ـ زبون2      5ـ الخروف (طفل صغير)

(يفتح الستار على دكانين لبيع الأقمشة أحدهما لحسن والآخر لسعيد)

حسن : أصبحنا وأصبح الملك لله .. والحمد لله .. يا فتَّاح يا عليم .. يا رزَّاق .. ارزقنا يا كريم ..

سعيد : (ينادي على المارة لشراء بضاعته) قرب .. قرب .. قرب .. اشتري القماش المستورد .. اشتري الحرير .. وافرشوا ع السرير .. قربي يا صبية .. خديلك جلابية .. حاجة مش معقولة .. قماش درجة أولى .. قرب .. قرب .. قرب .. اشتري القماش المستورد ..

(زبون1 يدخل دكان سعيد ويتفحص البضاعة)

سعيد : اطمن يا أستاذ .. خذها وأنت مغمض .. أحلف لك بإيه .. حتة سموكن ممتازة ميه ميه .. ولا فراخ الجمعية .. مستورد أصلي وفصلي ..

زبون1: وبكام المتر؟

سعيد : أحلف لك بإيه .. عشان انت راجل طيب .. وأول اصطباحه .. هدي هولك بأصل تمنه ..

زبون1: بكام يعني

سعيد : أحلف لك بإيه .. هبيع هولك بأصل تمنه .. أنا شريه بخمسين جنيه ..

زبون1: لا .. لا .. ده غالي

سعيد : خلاص .. هبيع هولك بأربعين جنيه بس .. عشان انت رجل طيب

زبون1: أنا هشتريه بعشرين جنيه

سعيد : أحلف لك بإيه هكون خسران

زبون1: من غير حلفان .. هشتريه بثلاثين جنيه .. ماشي

سعيد : شوف يا أستاذ .. أنا كلمتي واحدة .. عمرها ما تنزل الأرض أبدًا

زبون1: طب سلامو عليكو

سعيد : (يجذبه) تعالى .. تعالى .. خلا تنزل المرة دي .. بس عشانك رجل طيب .. بقولك ايه شوف كده القماش التان يده يمكن يعجبك (يغافله أثناء النظر ويضع في الكيس قماشا آخر غير الذي اختاره زبون1 ثم يعطيه الكيس) اتفضل .. يا لا مع السلامة .. شوف مصلحتك يا سيد .. (ينصرف الزبون فيكمل النداء على الزبائن) قرب .. قرب .. قرب .. اشتري القماش المستورد .. لو عايز قماش دمه خيف .. لا يزهقك شتا ولا صيف .. تعالى عندنا .. ف دكان الهنا .. قرب .. قرب .. قرب .. اشتري القماش المستورد ..

(زبون2 يريد الذهاب لدكان حسن فيجذبه سعيد لدكانه)

سعيد : تفضل هنا .. تفضل .. عندنا أحسن بضاعة يا بيه ..

زبون2: اوعى ايدك ياض .. هو الشراء بالعافية ولا ايه ؟! .. أنا هشتري م الراجل الطيب ده ..

سعيد : طب روح روح .. قبل م أفتح لك راسك ..

زبون2: بتقول ايه

سعيد : باقول هفتح الدكان .. انت بتقول شكل للبيع ولا ايه .. روح يا عم من هنا

(زبون2 يذهب لدكان حسن ويشاهد البضاعة)

زبون2: صباحك فل يا حج .. القماش ده مستورد ..

حسن : كل البضاعة اللي انت شايفها في الدكان صناعة محلية .. احنا بنشجع منتجات بلادنا ..

زبون2: ربنا يكتر من أمثالك يا حج .. وبكام المتر من ده ..

حسن : بعشرين جنيه ..

زبون2: بس .. من غير فصال ولا حاجة .. صحيح الدنيا لسه فيها خير ..

حسن : الحمد لله .. احنا كلمتنا واحدة .. بس ربنا يعنا على الستات اللي بيغلبونا في الفصال ..

ربنا يكون في عونك .. ويكتب لك حج بيته ..

حسن : الحمد لله يا بني .. أنا أديت الفريضة .. وإن شاء الله هحج السنة دي عن الوالدة الله يرحمها ..

زبون2: ربنا يكتر من أمثالك يا حاج .. تفضل (يعطيه النقود ويأخذ القماش وينصرف)

حسن : مع السلامة ..

سعيد : (ينادي على المارة لشراء بضاعته) قرب .. قرب .. قرب .. اشتري القماش المستورد .. اشتري الحرير .. وافرشوا ع

السرير .. قربي يا صبية .. خديلك جلابية .. حاجة مش معقولة .. قماش درجة أولى .. قرب .. قرب .. قرب .. اشتري القماش المستورد ..

(زبون1 يأتي غاضبًا إلى دكان سعيد ومعه الكيس فيه القماش)

زبون1: يا غشاش .. يا ضلالي .. ضحكت علي واديتني قماش غير اللي انا نقيته ..

سعيد : ملكش حاجة عندي .. يا للا امشي من هنا

زبون1: أنا همشي .. بس ع الشرطة

سعيد : وايه لازمتها الفضايح .. مفيش داعي .. هاتِ القماش .. وخد فلوسك (يعطيه عشرين ريالًا)

زبون1: ايه ده عشرين جنيه .. أنا مديك ثلاثين ..

سعيد : مهي العشرة جنيه .. قصاد ترجيع البضاعة ..

زبون1: يا غشاش .. يا حرامي .. أنا رايح للشرطة

سعيد : يا أستاذ مفيش داعي للفضايح .. خد يا خويا (يعطيه عشرة جنيه)

زبون1: دي مقطوعة .. مش هتصرف .. محدش هيرضى ياخدها

سعيد : إن مكانش عاجبك .. سيبها

زبون1: حسبي الله ونعم الوكيل .. (يتركه ويذهب لدكان حسن)

زبون1: القماش ده بكام يا حج ؟

حسن : بأربعين جنيه

زبون1: مفيش تنزيل يا حج ..

حسن : احنا كلمتنا واحدة يا ابني .. بنحب نجيب م الآخر ..

زبون1: هو بصراحة يستاهل يا حج .. بس أنا مش معايا اللوقتي إلا ثلاثين جنيه بس

حسن : ولا يهمك يا بني خده .. وجيب باقي الفلوس في أي وقت .. الدنيا لسه أمان (يعطيه له فيعطيه النقود)

زبون1: جزاك الله خيرا .. وبكم القماش ده ؟

حسن : ده مش للبيع .. ده لبس الإحرام بتاعي .. اشتريته النهارده ..

زبون1: ما شاء الله هتروح تحج السنة دي ؟

حسن : إن شاء الله .. كله بأمره ..

زبون1: ادعيلي يا حج .. سلامو عليكو (ينصرف)

حسن : وعليكم السلام ..

سعيد : الوقتي أنا عرفت ليه الناس بتسيبني .. وبتروح تشتري من جاري حسن ؟! طبعا عشانه بيروح يحج وأنا لا (يفكر جيئة وذهابا) تتصرف كيف يا عبد الرحيم .. تتصرف كيف يا عبد الرحيم .. وجدتها .. (يذهب إلى حسن) جاري وحبيبي الحج حسن .. بالحضن يا أعز الجيران .. (يحتضنه)

حسن : خير يا سعيد .. خير اللهم اجعله خير .. مش عوايدك يعني ..

سعيد : أصل أنا بدون مقاطعة كده  .. نويت أروح أحج السنة دي

حسن : ألف مبروك .. ربنا يوفقك لطاعته دايما .. بس

سعيد : بس إيه ..

حسن : متأخذنيش يعني .. لازم الحج  يكون بمال حلال

سعيد : قصدك إيه ؟! .. أنا لما أرجع هاغير كل حاجة

حسن : ربنا يهديك ..

سعيد : هاغير يافطة الدكان .. وأكتب عليها بخط كبير .. دكان الحاج سعيد .. وارسم كعبة كبيرة على البيت بتاعي .. وطيارة على الدكان .. وبينهم بالبنط العريض .. ذنب مبرور .. وحج مغفور ..

حسن : يا سعيد .. خلي نيتك في الحج خالصة لوجه الله .. مش عشان الناس والدنيا والبضايع

سعيد : فكرتني بالبضايع .. جاءتني فكرة روعة .. إنما إيه .. في الجون ..

حسن : خير ؟!

سعيد : أنا وأنت نلبس لبس الإحرام .. ونودع الجيران واهل الحتة واحد واحد .. ونروح بالزفة كده عل المطار مع بعض ..

حسن : وبعدين ؟!

سعيد : ولا قبلين .. أنت تتوكل على الله .. وتركب الطيارة اللي مسافرة مكة

حسن : وأنت؟!

سعيد : أنا بقه هاركب الطيارة اللي مسافرة دبي .. أروح ألم شوية بضاعة .. وبعد ما كل واحد فيا يخلص الشغلة اللي رايح لها .. نرجع مع بعض المطار في نفس الوقت .. وندخل الحتة سوا .. ونسلم على الجيران .. كأني كنتفي الحج معاك .. ولا من شاف .. ولا من دري ..

حسن : بس ده مينفعش

سعيد : مالك يا جدع .. متصحصح امال .. انت متعرفش ان واحد صاحبنا سافر .. وعمل عمرة طويلة الأجل في دبي .. ونفعت .. امال ايه .. انا مثقف وفاهم كل حاجة

حسن : بس أقول ايه للناس لو سألوني عنك؟!

سعيد : متقلهمش حاجة .. وأنا هاظبك بشوية بضاعة من هناك ..

حسن : شوف يا سعيد .. حد الله بيني وبين الرشوة .. وكمان مقدرش أكدب .. أنا هقولهم الحقيقة

سعيد : يا راجل .. انت صدقت ولا ايه .. انا كنت باهزر معاك .. بدامك مُصر كده بقه .. انا هآخذ ملابس الإحرام دي هدية (يأخذها)

حسن : متخدش حاجة بسيف الحياء ..

سعيد : ودلوقتي قولي بقه .. الواحد يعمل ايه في الحج؟ .. عشان انت عارف اخوك .. يعرف كل حاجة في الدنيا .. لكن الآخرة يعني شوية ..

حسن : شوف يا سعيد .. الحج له أركان وواجبات وسنن ..

سعيد : وإيه هي بقه أركان الحج؟حسن : أربع حاجات مينفعش الحج من غير واحد فيها .. الإحرام .. والوقوف بعرفة .. وطواف الإفاضة .. والسعي بين الصفا والمروة سبع مرات ..

سعيد : طب ممكن بدل الإحرام .. الواحد يلبس الحتة الزفرة اللي ع الحبل .. عشان الناس الغرب يعرفوا مقامنا؟!

حسن : يا سعيد اللبس ده .. عشان تفتكر الكفن اللي هتدفن بيه في قبرك .. ويتساوى الناس في اليوم العظيم .. ويفتكروا يوم القيامة .. فيخشعوا ويتواضعوا ويخضعوا لله تعالى ..

سعيد : طب ولازم يعني الواحد يقف طول النهار في عرفة؟!

حسن : من رحمة ربنا إنك تقدر تقعد أو تنام حتى .. ولكن يوم عرفة .. ده خير يوم طلعت فيه الشمس .. فعليك إنك تغتنم الفرصة وتكتر من الذكر والدعاء ..

سعيد : إلا مش احنا برضه هنكون على سفر؟! .. إيه رأيك نطوف ونسعى ثلاث مرات بس زي ما بنقصر الصلاة في السفر؟!

حسن : مش هارُدَّ عليك ..

سعيد : متزعلش .. باهزر معاك .. عشان تعرف برضه إني مثأف ولا مؤاخذه .. قل لي بقه واجبات الحج ..

حسن : واجبات الحج اللي لو الحاج ترك حاجة منها لازم يجبره بدبيحة .. منها المبيت في مزدلفة .. ومنى .. ورمي الجمار .. وطواف الوداع .. والحلق والتقصير ..

سعيد : وإيه الفرق بين الحلق والتقصير؟!

حسن : التقصير هو قص الشعر بمقص أو ماكنة .. والحلق تشيله بالموس .. زلابطة يعني .. والحلق أفضل طبعًا ..

سعيد : مقصدش ده .. أقصد أنهو الحلاق بياخد عليه فلوس أقل ؟! 

حسن : مش هاردَّ عليك ..

سعيد : متزعلش .. باهزر معاك .. قل لي بقه سنن الحج ..

حسن : سنن الحج منها الاغتسال للإحرام .. وملابس إحرام بيضا ونضيفة .. والتلبية .. وطواف القدوم .. وتبوس الحجر الأسود .. والرَمَل .. والاضطباع فيه .. وركعتين خلف مقام إبراهيم والشرب من ماء زمزم بعد الطواف .. والمبيت بمنى يوم تمانية ..

سعيد : بس انت مجبتش سيرة الضحية

حسن : ما هو مفيش ضحية على الحاج .. ولكن يُستحب انه يذبح هدي إذا حج مفردًا .. ولكن واجب عليه يذبح هدي لو حج متمتع أو قارن ..

سعيد : وبكم سعر الخروف؟!

حسن : بحوالي 350 ريال .. وغالبا بتوكل عنك مؤسسة خيرية هتوزع اللحمة على الفقراء في دول كتيرة محتاجة

سعيد : بس كده غالي جدًا .. أنا هاشتري واحد بنفسي .. (يخرج ويعود بخروف هزيل مكسور القرن وأعور)

حسن : يا وقعتك بيضه .. اشتريته بكام ده؟!

سعيد : بمائة ريالٍ فقط .. إيه رأيك في شطارتي ونصاحتي ؟

حسن : بس ده .. هزيل جدًا .. وأعور .. وقرنه مكسور .. مينفعش يدبح ضحية

سعيد : هاوريك ينفع و لا لأ (يحاول ذبحه فيهرب منه الخروف بحركات مضحكة)

حسن : استنا يا جدع انت .. استنا .. هتضيع عليك الميت ريال من غير فايدة

سعيد : واد يا خروف .. هاتِ الميت ريال ياد (يعطيها له الخروف) .. روح لصاحبك .. عليك اللحمة .. (لصديقه) وإيه اللي بعد كده ؟!

حسن : خلاص .. كده الحج يبقى خلص .. والحمد لله

سعيد : بس كل الأعمال اللي قولتها دي .. متخدش من الحاج خمس تيام بالكتير .. أمال بيقعدوا في مكة أكتر من كده ليه ؟!

حسن : عشان يكتروا من الصلاة في الحرم .. دي الصلاة فيه بمائة ألف فيما سواه .. ويطوفوا بالكعبة المشرفة .. ويذكرون الله تعالى ويقروا قرآن ..

سعيد : أنا بقأه .. هقضي الوقت في شرا البضايع .. والهدايا عشان الناس تيجي تسلم علي .. وأنا مجعوص قدام البيت كده .. وهما بيقولوا لي .. حمد الله ع السلامة يا حاج ..

حسن : وناوي تشتري إيه بقه ؟! ..

سعيد : انت خبرة في الموضوع ده .. تنصحني بإيه ؟!

حسن : أنصحك بشرا هدايا بسيطة متضيعش وقتك .. وتذكر الناس بالطاعة .. سواك .. سبحة .. سجادة صلاة .. مية زمزم .. تمر المدينة .. وأنصحك قبل كل ده وده .. إنك تقي الله في الأيام المفترجة دي .. دا الحج المبرور ملوش جزاء إلا الجنة .. بيرجع منه الإنسان نضيف من كل ذنوبه .. وانت ذنوبك ياما ..

سعيد : آه والله يا حج حسن .. ذنوبي ياما .. (يبكي)

حسن : الحمد لله .. دي فرصة كبيرة للتوبة .. اوعى تضيعها من ايدك ..

سعيد : تبت إلى الله .. تبت إلى الله ..

الاثنان: يالا بينا (يأخذ حسن بيد سعيد ويرددان معًا) لبيك اللهم لبيك .. لبيك لا شريك لك لبيك .. إن الحمد والنعمة لك والملك .. لا شريك لك .. لبيك اللهم لبيك .. لبيك لا شريك لك لبيك .. إن الحمد والنعمة لك والملك .. لا شريك لك ..

(ستار)